Кин мон?

Удмурт-а мон? Ӟуч-а мон? Кызьы огшоры улонын валэктыны адямиослы, мынам кык анай кылы, кык культурае шуыса? Кызьы аслэсьтым кин луэмме валэктом? Берло дыре та юанэз ӵемгес аслым ачим сётӥсько.

Котькуд нунал улонэ монэ выль адямиосын тодматэ. Котькуд нунал мон валэктоно луисько соослы, Россиын ӟучъёс сяна туж трос пӧртэм калыкъёс уло шуыса. Удмуртъёс, бигеръёс, поръёс… Тау, Калашниковлы, со ӵем дыръя капчиятэ югдурез. Эшшо Урал гурезьёс туж юртто.

Удмурт шаер сярысь кылэм/тодӥсь адямиен вераськыкум, мон солы ваньзэ удмуртъёс сярысь верасько. Соос понна мон — кыӵе ке абориген :) Таӵеосызлэн ӵем дыръя сюрсюанзы вань: тӥляд зэм но нимаз кылды вань? нош удмурт коньдон вань-а? кӧня адями удмурт кылын вераське?….

Кылсярысь, мон яратӥсько пӧраськыны. Мон ӟучсэ но, удмуртсэ но пӧрасько. Сойзэ но, тайзэ но яратӥсько но аслам карисько. Мар ке пӧрасько ке, эшъёсылэн нырысетӥ юанзы: та удмурт яке ӟуч.

НО! Куке мон ӟуч кылъя урок нуисько, мон кин? Удмурт яке ӟуч? Мон асме «два в одном» шӧдӥсько. Кыксэ ик кылэз пичи дырысен уже кутӥсько… Но та учырын (ӟуч кылъя урокын) мон тросгес ӟуч.

Билингвизм сярысь трос лыдӟыны луэ. Вотэсын но тачак талы сӥзем вотэсбамъёс. Малы адямиос уг валало, дуннеын трос гинэ адямилэн кык анай кылыз вань шуыса. Менталитет вылэ кылтодон кельтэ пытьызэ. Мадьяр шаерын тросэз мадьярен гинэ верасько (та сярысь Шаланки Жужа но вералляз МУ радиоын сётэм интервьюаз), оло соин соос понна  кыккылолык кыӵе ке мудрон но валэнтэм потэ… Ӧйтӧд.

Кин мон? Мон — удмурт… но мон ӟуч но…

foto: Péter Papp
турын-куарлы шумпотэм Маша

Добавить комментарий

Ваш e-mail не будет опубликован. Обязательные поля помечены *