Сюрес вылын малпанъёс

…Нош ик пушкам нюръяське кык мон: одӥгез пыкиське, уг поты нокытчы  шуныт гуртысь кошкемез, нош мукетыз вузэ дорын, выль сюресъёсты вите.

Озьы ик улӥсько. Котьку сопала но тапала соос монэ кыско. Али тани сюресъёсты яратӥсез вормиз. Нош ик сюрес романтика: Москваозь поездэн, Будапештозь — самолётэн.

Таязэ туж вераськисьтэм адямиосын сюри. Ӵемысь плацкартысен ик кутско тодматсконъёс, нош та дыре ӧз на кутске. Ваньмыз азьланяз на, дыр. Поезд лэйкатыса нуэ Муское.  Сыӵе валантэм малпанъёс йырам, но анаелэн чилясь синъёсыз азям.
Малы меда котьку сыӵе вӧсь лэзьыны? Кошкыны? Анае али шуысал ни: ачид анай луид ке, валалод ай, мар мон шӧдӥсько…

Оломар но йырам лыктэ. Пыкылисько но асме: марлы мурт шаере мынӥсько; кылэз но лад-лад уг тодӥськы; нош ик дышетскисько, уг ужаськы но эшшо маръёс ке. Нош мукет ласянь, мон туж умой валасько, малы мон мурт шаере кошкисько))) Ма кемалы ик ӧй кошкы уг, 5 толэзь ортчыса, берен Удмуртие вуо (одӥг ар кунгож сьӧрын улэм адямилы, со трос-а ма), дыр ортчемез шӧдыса ик вуоно ӧвӧл.

Поездын укыр трос дыр кулэез но, кулэтэмез но сярысь малпаськыны. Нош мон со малпанъёсме гожтоно кариськи на. Кин тодэ, оло 5 ар ортчыса, тунсыко луоз та малпанъёсме выльысь лыдӟыны… Соку трос мар улонам мукет луоз ни.

Нош али поезд лэйкатэм улэ, умме усисько ни…U2XCGiDUYkA

Добавить комментарий

Ваш e-mail не будет опубликован. Обязательные поля помечены *