Чорыг коньдон вае…

rljfusgti5c

24 толшоре, нуназе бере, урамын одӥг лулэз но уд пумита — ваньзы гуртазы пуко, дасясько. Вузкаронниос но обедозь гинэ ужало. Котькин но, туж тыршыса, берпуметӥ кузьымъёссэ дася но эшшо одӥг пол менюзэ эскере. Матэктэ тужгес но бадӟымез европейской праздник— Ымусьтон.

Толшоре котькытын котькин Выль арез но Ымусьтонэз вите. Финнъёс толшор толэзез юнме «Ымусьтонлэн толэзен» уг нимало ук. Европаын тросаз шаерын католической осконзы, соин сэрен Ымусьтонзэс но 25 толшоре пусъё. Мадяр шаерын но, кылсярысь. Европаысь Ымусьтон, мон понна, милям Выль армылы укша. Лыдӟыса, асьтэос ӵошатыны быгатоды.

Та толэзь кутскемен Мадяр каръёсы но гуртъёсы праздник мылкыдъёс вуизы: асьме дорын кадь чильтро кызъёс пуктӥзы, гирляндаос ӝуатӥзы, но ярмаркаос усьтӥзы. Котькуд ӝытазе со ярмаркаосын улон «пӧзе»: выль ар крезьгуръёс кылӥсько, отын ик адямиос ӝытазеяло, кин ке глинтвейн юэ, мукетъёсыз сувениръёс, кузьымъёс, дӥськут басьто. Урамтӥ ортчыку, пыжиськемлэн но пыжем каштанъёслэн зынзы гочатэ. Ӧтӥ ортчыкум, мае ке оскалтытэк уг чидаськы. Лымы ӧвӧл бере, Выль арлэсь вуэмзэ ярмаркаосысь шулдыр куараос но тылъёс гинэ тодэ вайыто.

Котькуд толшор нунал — со пичи ымусьтон кадь. Ымусьтон азьын ньылез арня нунал адвент нимаське. Нырысетӥ адвентэ (шуркынмонлэн пумаз яке толшорлэн кутсконаз тупа) кыз вайёслэсь, шудонъёслэсь, кускылилэсь тугоко дасяло. Тугокоын — ньыль сюсьтыл. Котькуд адвентэ одӥгзэ сюсьтылэз ӝуато. Берпуметӥзэ ӝуатӥське ке — уске Ымусьтон матын ни. 13 толшоре — Люциялэн нуналыз. Люция — со югытлэн символэз. Азьвыл календарья та дырысен нуналъёс кузёмыны, нош уйёс вакчияны кутско вал. Мадяр шаерын та нуналэ нылъёс тунаськылӥллям. Ми дорын кадь ик кагазъёсы пиослэсь нимъёссэс гожъяллям, сюсез ву вылэ виятӥллям.

Вузкаронниысын но шӧдӥське праздникъёслэн матэктэмзы: ёлкаос, горд шапкаё кассиръёс но «скидкаос» сяна, котькытысь кузь черодъёс кыстӥсько. Праздникъёс азьын валаны кутскиськод, та карын трос калык улэ вылэм шуыса (огшоры дыръёсы урамъёс бушесь). Татын ӵемысь кызэз кампетэн чеберъяло, соин магазинъёсы пӧртэм шӧмо но буёло кампет «кылдэ». Мадяр шаерын со «салонцукор» («szaloncukor») нимаське. Вераны кулэ, огшоры дыръя татын, асьме дорын кадь, кампетэз котькытысь басьтыны уг луы. Соин Ымусьтонэ «голькыт ымъёс» тужгес но лӧпто.

Урамъёсын чилясь кызъёс быдэс толэзь мылкыд кузьмало, нош коркаосын но квартираосын 24 толшоре гинэ кыз пукто. 24 толшоре — сочельнике, тужгес но жадьытӥсь нунал: вузкаронние бызьылоно (25 но 26 толшоре вань вузкаронниос но ресторанъёс шутэтско), кузьымъёсты дасяса вуттоно, пыжоно но пӧзьтоно…

Ымусьтонэз мадяръёс сямья куспын ортчыто. Одӥг ӝӧк сьӧрын пичиез но, мӧйыез но интыяське. Мадяр ымусьтонэ нырысь одно ик чорыг шыдэз (halászle) сиё, мадяръёс оско чорыг коньдон вае шуыса. Собере «валтӥсь» сиён вуэ: пыжем чорыг яке пыжем сӥль (бурдоослэсь сӥльзэс Ымусьтонэ уг сиё, бурдо шудэз, пе, нуэ), но бордаз емышъёслэсь лечо яке голубцы. Сиён-юон йылпумъяське голькытэныз, кылсярысь, бейглиен (bejgli). Бейгли — со миндален яке грецкой мульыен, макен яке каштанэн рулет, кудзэ котькуд семья пӧртэм сямен пыже (туала улонын котькытысь дасьсэ но луэ басьтыны). Кӧтэз тырем бере, кузьмаськон дыр вуэ (кузьымъёс азьло ик кыз улын дасямын ни), ӟечкыланъёс но сӥзёнъёс.

Мыным шуд усиз таӵе зэмос мадяр Ымусьтонэ пыриськыны, мадяръёсын ӵош кызэз но пуктыны, пӧраськыны но шулдыръяськыны.

Boldog Karácsonyt! (Болдог Карачоньт)кылӥське котыр. Кызьы тӥ валады ни луоз, со «Шулдыр Ымусьтонэн» шуыса берыктӥське.

Добавить комментарий

Ваш e-mail не будет опубликован. Обязательные поля помечены *