Гужем гуртын умой. Бакчае потӥд но — я льӧм, я вишня, я сутэр куӵо-каӵо весьёсын кырымдэ тырмытӥд- йырыд ик пӧрме,ява, зынызлэсь. Сутэр куакмы котьку трос вал: векчиез но, тазаез но. Тулыс югыт-вож пинал куаръёсызлэсь чай парим — пыштурынэн кадь ик ческыт. Гужем варення пӧзьтӥм, дас-кызь пичигес но бадӟымгес банка пеймыт пуштросэн рядэн-рядэн ӝӧк выламы интыяськизы. Пӧлысьтымы огмы но чырсалэс варенняез ӧм яратэ. Куддыр, мунчо бере, морс юылӥм яке Ижысь куноосмылы салам лэзьям, уго соослэн сыӵе доброзы ӧй вал.

— Ум ке сике, малы арлы быдэ сутэр варення пӧзьтӥськом? — юай мон мамалэсь одӥг гужеме.

— Ӧз ке луы, сиемед потоз — валэктӥз со, варенняысь шукызэ люкаса. Дыр ортчиз, трос варення пӧзьтӥськиз, нош сутэрлэсьсэ ми дорын, азьло кадь ик,нокин ӧз яратыны. Мон ӧй ни куареты, кулэ бере — ведраосыз тырмытӥ,нош мама сое пӧзьтӥз.

Школаме йылпумъяса Иже дышетскыны кошки. Гуртын улыкум ведра нуллӥсько ке вал, карын секыт сумкаос нуллытэк ӧйлась: картошка, пыжиськем, сылалтэм — огъяулонниын ваньмыз ческыт. Сутэр вареннялэн но шӧмыз мукет. Бускель висъетысь нылъёсты-пиосты ӧтӥськод но ческытлэсь ческыт варенняен чай юыса, шудо егит дырдэ улӥськод. Котырад – мусо эшъёсыд, ӝӧк вылад – пыштурынэн чай но сутэр варення. Валаса ик вуттоно ӧвӧл — эшшо одӥг банка бушаз…

Трос ар ортчиз ни со дырысен. Трос оломар но воштӥськиз. Нылъёс бызьызы ни, табере нимзы но мукет, пиос – зэмос воргоронъёслы пӧрмизы. Одӥгез воштӥськонтэм: сутэр варенняен чай юыкум, нош ик 18 аресъем студент луисько.

Добавить комментарий

Ваш адрес email не будет опубликован. Обязательные поля помечены *